Yozni mazmunli o‘tkazing! Dunyoning yetakchi universitetlaridan birida uch oylik ushbu dasturda qatnashib, zamonaviy tadqiqot loyihalarida ishtirok eting.

Bu dastur Kompyuter fanlari, Kompyuter injiniringi, Telekommunikatsiya yoki Elektr injiniringi yo‘nalishlarida (bizning Raqamli iqtisodiyot yo‘nalishiga mos keladi) tahsil olayotgan bakalavr va magistratura talabalari uchun mo‘ljallangan. Amaliyot va tadqiqot dasturi odatda 2-3 oy davom etadi va maydan sentabr oyigacha bo‘lgan davrda o‘tkaziladi. Aniq amaliyot oylari esa mezbon laboratoriya bilan kelishiladi.

Nomzodlar amaliyot yoki tadqiqot olib borish uchun yuqoridagi yo‘nalishlardan uchtasini tanlashlari mumkin. Ishtirokchilar o‘z sohasi bo‘yicha ilg‘or olimlar bilan birgalikda tadqiqotlar olib boradi va muammolarni yechishda yordam beradi. Odatda bu vazifalar dasturlash yoki murakkab dizayn ishlari bilan bog‘liq bo‘lishi mumkin.

Amaliyot dasturi ingliz tilida olib boriladi.

Grantning afzalliklari:

• Oyiga 1800 CHF (taxminan 2 100 dollar atrofida) miqdorida stipendiya taqdim etiladi.
• Safar xarajatlari (2-klass poyezd chiptasi yoki ekonom-klass aviachipta) qoplanadi.

Talablar:

• Istalgan davlat fuqarolari ariza topshirishi mumkin.
• Bakalavr talabalari kamida 2-kursda bo‘lishi kerak, 1-kurs talabalari qatnasha olmaydi.
• Magistratura talabalari 1-kursda o‘qiyotgan bo‘lishi kerak.
• PhD talabalari dasturda qatnasha olmaydi.
• Nomzodlarning akademik ko‘rsatkichlariga e’tibor qaratiladi.
• Ingliz tilini yaxshi bilish shart, nomzodlardan ingliz tilini bilish darajasini aniqlash uchun suhbat o‘tkaziladi (sertifikat talab qilinmaydi).

2025-yilda o‘tkaziladigan dastur uchun ariza qabul qilish 2024-yilning noyabr oyida boshlanadi va 2025-yil 1-dekabrda yakunlanadi. Arizalar https://summer.epfl.ch sayti orqali onlayn qabul qilinadi. Qabul muddatidan kamida ikki hafta oldin ariza topshirish jarayoni boshlanishi kutiladi, shu sababli saytda yangiliklarni kuzatib borish tavsiya etiladi.

Ariza topshirish paytida nomzodlar tadqiqot olib borish istagan sohalarni tanlaydi. Tadqiqot yo‘nalishlari bilan https://www.epfl.ch/schools/ic/research/domains/ havolasi orqali tanishish mumkin. Arizani to‘ldirishda berilgan savollarga javob berish, so‘ralgan ma’lumotlarni kiritish va quyidagi hujjatlarni taqdim qilish kerak:

• CV
• Hozirgacha olingan baholar
• Motivatsiya xati (bir sahifalik bo‘lishi tavsiya etiladi) Ariza va barcha hujjatlar ingliz tilida bo‘lishi kerak. Agar hujjatlar ingliz tilida bo‘lmasa, tarjimasi bilan birga taqdim etilishi shart. Hujjatlar faqat PDF formatda yuklanadi.

2025-yilning yanvar oyining oxirigacha barcha nomzodlarga ariza natijalari email orqali xabar qilinadi. Qabul qilinganlar 2025-yilning yozida 2 yoki 3 oy davomida amaliyot o‘taydi. Amaliyot davri mezbon laboratoriya bilan kelishiladi.
Ko‘p beriladigan savollarga javoblar ushbu saytda https://summer.epfl.ch/apply.html#faq

Batafsil ma’lumot uchun ushbu havolaga o‘ting https://summer.epfl.ch/  Yoki xalqaro hamkorlik bo‘limiga murojaat qilishingiz mumkin. A-bino, 2-qavat.

Aloqa uchun Telegram va telefon raqami: 91 534-54-14 (Olim Muydinov).