Vengriya hukumati bakalavriat, magistratura, doktorantura, tayyorlov kurslari va talabalar almashinuvi dasturlarida tahsil olishni istovchilar uchun maxsus grant dasturini taklif etadi. Stipendium Hungaricum Scholarship Programme — bu barcha ta'lim bosqichlarini qamrab oluvchi va 1-2 semestrlik (almashuv dasturlari) grantlarni o'z ichiga olgan Vengriya stipendiya dasturi hisoblanadi.

Bu dastur Vengriyadagi ko’plab universtetlarni o’z ichiga oladi va deyarli barcha yo’nalishlar uchun grantlar mavjud.

Ushbu dastur Vengriya hukumati hamda turli davlatlarning ta'lim vazirliklari o‘rtasidagi ikki tomonlama hamkorlik bitimlari asosida tashkil etilgan bo‘lib, 5 qit'ada joylashgan 70 dan ortiq mamlakatni, jumladan, O‘zbekistonni ham qamrab oladi. Grantning asosiy maqsadi — Yevropa standartlari asosida yuqori malakali mutaxassislarni tayyorlashdir.

Stipendium Hungaricum Scholarship Programme grantlari quyidagi ta'lim bosqichlari uchun mo‘ljallangan:

1. Bakalavriat — 2-4 yil.
2. Magistratura — 1,5-2 yil.
3. Bir bosqichli magistratura (bakalavriat va magistraturani qamrab oluvchi) — 5-6 yil.
4. Doktorantura (PhD) — 4 yil.
5. Venger tilini o‘rganishga qaratilgan 1 yillik tayyorlov kurslari.
6. Bakalavriatdan keyingi ixtisoslik kurslari — 1-2 yil.
7. Bakalavriat, magistratura va doktorantura bosqichlari uchun 1-2 semestrlik almashuv dasturlari (dastur yakunida sertifikat beriladi).

2025-2026-o‘quv yilida mazkur dastur orqali O‘zbekistonlik nomzodlar barcha bosqichlar — bakalavr, magistratura, bir bosqichli magistratura va doktorantura, shuningdek, almashuv dasturlarida ishtirok etishlari mumkin. Grantga ariza topshirishda nomzodlar Vengriyadagi ishtirokchi universitetlar va yo‘nalishlarni mustaqil tanlash imkoniyatiga ega.

Grantning afzalliklari:
Grant sovrindorlari quyidagi imtiyozlar bilan ta'minlanadi:

• O‘qish to‘lovi (kontrakt)dan to‘liq ozod etiladi.
• Barcha bosqich va dasturlardagi talabalar o‘qish boshlanishidan boshlab tugaguniga qadar yil davomida 12 oy davomida oylik stipendiya oladi. Stipendiya miqdori:

Doktorantura (PhD) bosqichi talabalari uchun dastlabki 2 yilda oyiga 140 000 HUF (350 yevro), keyingi 2 yilda esa oyiga 180 000 HUF (450 yevro).

Boshqa bosqich va dasturlar uchun oyiga 43 700 HUF (110 yevro).

• Yotoqxona joyi bepul taqdim etiladi.
• Bepul tibbiy xizmatlar bilan ta'minlanadi va yiliga 160 yevrogacha qo‘shimcha tibbiy sug‘urta mablag‘i ajratiladi.

Oylik stipendiya odatda talabaning barcha xarajatlarini (oziq-ovqat, o‘quv qurollari, kiyim-kechak, transport va boshqalar) to‘liq qoplamasligi mumkin. Shu sababli, talabadan o‘z shaxsiy mablag‘lari bilan qo‘shimcha xarajatlarni qoplash talab etilishi mumkin.

Vengriyada o’rtacha yashash xarajatlari:
https://studyinhungary.hu/living-in-hungary/menu/your-costs-of-living.html

Talab qilinadigan hujjatlar:

1. Motivatsion xat: Nomzodlardan kamida 1 betlik motivatsion xat topshirish talab qilinadi. Ushbu xatni o'zingiz yozishingiz kerak bo‘lib, unda nima uchun ushbu grantga ariza topshirayotganingiz, qaysi yo‘nalishda o‘qishni xohlayotganingiz va nega o‘qish uchun aynan Vengriyani tanlaganingiz haqida ma’lumot berishingiz lozim.
2. Ta'limga oid hujjatlar: Nomzodlar quyidagi hujjatlarni topshirishlari talab etiladi: bakalavriat uchun murojaat qilayotganlar maktab attestatini (o‘rta maktab diplomi), magistratura yoki doktorantura uchun murojaat qilayotganlar esa bakalavr/magistr darajasi haqidagi diplomni taqdim etishlari lozim.
3. Universitetdagi o‘zlashtirish ko‘rsatkichlari: Nomzodlar o‘zlari tamomlagan darajaga oid rasmiy va batafsil transkriptni taqdim etishlari shart.
4. Til bilish darajasini tasdiqlovchi hujjat Har bir ariza bilan til bilish darajasini tasdiqlovchi hujjat taqdim etish talab etiladi. Nomzodlar o‘qish uchun tanlagan dastur va o‘qituvchi muassasaning til talablarini tekshirib ko‘rishlari kerak.
5. Pasport nusxasi: Hujjatlaringiz bilan birga pasportingizning nusxasini taqdim etishingiz kerak
6. Tibbiy guvohnoma: Sog‘liq holati yaxshi ekanligini tasdiqlovchi tibbiy guvohnomaning skanerlangan nusxasi.

Arizalar 2025-yil 15-yanvarga qadar qabul qilinadi

Ariza topshirsh uchun havola:

https://apply.stipendiumhungaricum.hu/

Rasmiy havola: https://stipendiumhungaricum.hu/

Dastur yuzasidan savollaringiz mavjud bo’lsa filialimiz

Xalqaro hamkorlik bo’limi bilan bog’lanishingiz mumkin.
A bino 2-qavat
Olim Muydinov (+998 91 534 54 14)