ТДИУ Самарқанд филиалида “Экофаол талабалар” бўлими ва “Эковолонтёр талабалар ҳаракати” ташаббуси билан “Эко-этика ва экологик маданият” мавзуcидаги навбатдаги семинар-тренинг бўлиб ўтди. Тадбирда экологик маданиятни ошириш, яшил иқтисодиёт тамойилларини тарғиб этиш ҳамда талабаларни экологик лойиҳаларда фаол иштирок этишга рағбатлантирувчи маърузалар ва амалий машғулотлар ўтказилди. Мазкур ташаббус Президентнинг 2025-йил 15-майдаги PQ–184-сон қарори билан тасдиқланган “2030-йилгача экологик маданиятни юксалтириш концепцияси”ни амалга оширишга хизмат қилади.

2025-йил 18-октябр куни ТДИУ Самарқанд филиали “Иқтисодиёт” факультети “Рақамли иқтисодиёт ва ахборот технологиялари” кафедраси профессор-ўқитувчилари Қўшработ туманидаги 1- ва 2-сон ихтисослаштирилган мактаб-интернатларида илмий ҳамкорлик ва интеграцияни мустаҳкамлаш мақсадида учрашувлар ўтказдилар.
Доцентлар У. Убайдулаев ва Х. Худойбердиев томонидан “Математиканинг инсон ҳаётидаги ўрни” мавзусида ўқув-семинар ташкил этилиб, ўқувчилар билан очиқ мулоқот ҳамда савол-жавоблар бўлиб ўтди.
Учрашувлар мазмунан бой, илмий жиҳатдан самарали ва мотивацион руҳда ўтди.

2025-йил 20-ноябр куни ТДИУ Самарқанд филиали ва АҚШнинг Washington University of Science and Technology (WUST) ўртасида ўзаро ҳамкорликни ривожлантиришга қаратилган Memorandum of Understanding (MoU) имзоланди. Мазкур келишув қўшма илмий тадқиқотлар, профессор-ўқитувчилар ва талабалар алмашинуви, қўшма дастурлар ҳамда Double Degree лойиҳаларини амалга ошириш учун муҳим қадам бўлди.

ТДИУ Самарқанд филиалида коррупцияга қарши курашишга бағишланган ижодий расмлар танлови ўтказилмоқда. Танлов талабаларнинг ҳалоллик, адолат ва шаффофлик каби қадриятлар ҳақидаги қарашларини санъат орқали ифодалашга қаратилган. Энг яхши ишлар сараланиб, ғолибларга эсдалик совғалари топширилади.

ТДИУ Самарқанд филиалида коррупцияга қарши курашга бағишланган “Антикоррупция билимдони” интеллектуал беллашуви шоупрограмма тарзида ўтказилди. Талабалар билим, саҳна маҳоратлари ва креатив чиқишлари билан фаол иштирок этиб, коррупцияга нисбатан қатъий позицияси билан ажралиб турди. Беллашувда Иқтисодиёт факультети, Бухгалтерия ва молия факультети ҳамда Қўшма таълим дастури жамоалари иштирок этди.

“Антикоррупция билимдони” танловида Иқтисодиёт факультети 1-ўрин, Қўшма таълим дастури 2-ўрин, Бухгалтерия ва молия факультети 3-ўринни эгаллади.

29-ноябр куни бўлиб ўтадиган йиғилишда Президент қарорлари ижроси, Конституциянинг 33 йиллигини нишонлашга тайёргарлик ва филиалнинг илмий салоҳиятини оширишга қаратилган “Йўл харитаси”даги вазифалар ижроси муҳокама қилинади.

Бугун, 2025 йил 28 ноябр куни, ТДИУ Самарқанд филиалида битирувчи талабалар учун йилнинг энг муҳим тадбирларидан бири — “Меҳнат ярмаркаси – 2025” юқори савияда ўтказилди. Ярмарка давомида талабалар турли корхона ва ташкилотлар вакиллари билан учрашиб, мавжуд вакансиялар, стажировка ва иш таклифлари ҳақида батафсил маълумот олишди.
Бугунги учрашув ва мулоқотлар ёшлар учун келажакдаги касбий муваффақиятларга пойдевор бўлиб хизмат қилади. ТДИУ Самарқанд филиали битирувчилари кариерасида янги босқичга адим ташлашди.

ТДИУ Самарқанд филиалида Ибн Халдуннинг “Муқаддима” асарига бағишланган илмий-муҳокама тадбири самарали ўтказилди. Талабалар мазмунли бахс-мунозараларда фаол иштирок этиб, асар ғояларини янги ёндашувда таҳлил қилишди. Тадбир якунида фаол иштирокчилар эсдалик совғалари билан тақдирланди. Илмга қизиқиш ва изланиш бу ерда қўллаб-қувватланади.

Тошкент давлат иқтисодиёт университети Самарқанд филиалида 2025-йил 26-ноябрь куни Ёшлар иттифоқи бошланғич ташкилоти ва “Экофаол талабалар” бўлими ташаббуси билан “Эковолонтёр талабалар ҳаракати” томонидан “Маҳаллий чиқиндилар муаммоси ва экоташаббуслар” мавзусида плоггинг акцияси ўтказилди. Акция давомида волонтёр талабалар ҳудудни чиқиндилардан тозалаш билан бирга экологик маданиятни тарғиб қилишга ҳам алоҳида эътибор қаратдилар.