Hurmatli professor-o‘qituvchilar va aziz ustozlar!

1-oktyabr – O‘qituvchi va murabbiylar kuni munosabati bilan sizlarni chin qalbimdan tabriklayman!

2019-yildan buyon birgalikda fidokorona mehnat qilib kelayotganimizga ham 5 yildan oshdi. Shu yillar mobaynida siz, aziz ustozlarimiz, o‘z bilim va tajribangizni ayamagan holda, xalqimiz farzandlarini bilimli, tarbiyali va vatanparvar etib voyaga yetkazishda ulkan xizmat qildingiz. Biz filialimizni ilk qadamlaridan boshlab rivojlantirish yo‘lida birga bo‘ldik, qiyinchiliklarni yengib o‘tdik va yangi marralarni zabt etdik. Sizlarning bu yo‘ldagi sabr-toqatingiz va fidoyiligingiz alohida tahsinga loyiqdir.

Ustoz – bu nafaqat bilim beruvchi, balki qalblarga nur sochuvchi, insonni to‘g‘ri yo‘lga boshlovchi, hayot saboqlarini o‘rgatuvchi buyuk zotdir. Sizlarning ibratli hayot yo‘lingiz, tinimsiz izlanishingiz va mehribon qalbingiz tufayli filialimiz yutuqlari xalqimiz va yoshlarimiz qalbida mustahkam o‘rin egallab kelmoqda.

Samarqand filialining bugungi nufuzi va obro‘-e’tibori – bu sizlarning fidokorona mehnatingiz samarasi. Har bir loyihamiz, erishgan yutuqlarimiz, xalqaro hamkorliklarimiz va o‘quv jarayonidagi muvaffaqiyatlarimiz ortida sizning fidoyiligingiz mujassam. Men bunday bilimdon, sadoqatli va fidoyi jamoa bilan yonma-yon ishlayotganimdan cheksiz faxrlanaman!

Sizlarga sihat-salomatlik, bardavom kuch-g‘ayrat, ilmiy va ijodiy faoliyatingizda ulkan muvaffaqiyatlar, oilaviy farovonlik va baxt-saodat tilayman. Yurtimiz kelajagi uchun qilayotgan xizmatlaringiz doimo qadrlanadi va e’zozlanadi.

Hurmat va ehtirom ila,Toshkent davlat iqtisodiyot universiteti Samarqand filiali direktori professor Olim Murtazayev