Toshkent davlat iqtisodiyot universiteti Samarqand filialida “Ogohlik — davr talabi” shiori ostida keng qamrovli ma’naviy-ma’rifiy tadbir o‘tkazildi. Mazkur tadbir oliy ta’lim muassasalarida tahsil olayotgan yoshlar orasida radikallashuvning oldini olish, ularni turli zararli oqimlar ta’siridan himoya qilish hamda virtual diniy jamoalarga qo‘shilib ketish xavfini kamaytirishga qaratildi.
Tadbir davomida mutaxassislar tomonidan yoshlar ongiga salbiy ta’sir ko‘rsatishi mumkin bo‘lgan yot va buzg‘unchi g‘oyalar, internet tarmog‘ida faoliyat yuritayotgan radikal oqimlarning targ‘ibot usullari, ularning psixologik ta’sir mexanizmlari hamda asl maqsadlari haqida batafsil tushuntirishlar berildi. Ayniqsa, ijtimoiy tarmoqlar va messenjerlar orqali yoshlarni o‘z safiga jalb etish yo‘llari, yolg‘on va manipulyativ axborotlardan foydalanish usullari misollar asosida tahlil qilindi.
Shuningdek, radikallashuvning kelib chiqish sabablari, yoshlarning mafkuraviy immunitetini mustahkamlash zarurati, axborot xavfsizligini ta’minlash, tanqidiy fikrlash ko‘nikmalarini rivojlantirish va huquqiy savodxonlikni oshirish masalalari keng yoritildi. Talabalarga qonunchilikda belgilangan javobgarlik choralari, shuningdek, shaxsiy mas’uliyat va ogohlikning ahamiyati haqida ham atroflicha ma’lumot berildi.
Tadbir yakunida yoshlarni mustaqil fikrlashga, turli axborot manbalarini tahlil qilishga va har qanday shubhali chaqiriqlarga nisbatan hushyor bo‘lishga chaqirildi. Mazkur uchrashuv talabalarda fuqarolik mas’uliyati, ma’naviy barqarorlik va ogohlikni kuchaytirishga xizmat qildi.