2026-yil 19-fevral kuni Toshkent davlat iqtisodiyot universiteti Samarqand filiali Iqtisodiyot fakultetida “Kelajakka qadam” markazi loyihasi doirasida 4-bosqich kunduzgi ta’lim yo‘nalishi talabalari bilan uchrashuv tashkil etildi. Mazkur tadbir bitiruvchi yoshlarni qo‘llab-quvvatlash, ularning kelgusidagi kasbiy faoliyatini samarali yo‘lga qo‘yish hamda moliyaviy imkoniyatlar to‘g‘risida xabardorligini oshirish maqsadida o‘tkazildi.

Uchrashuvda fakultet dekani G‘.A.Ibragimov, “Yashil iqtisodiyot va barqaror biznes” kafedrasi mudiri O.Pardaeva, Talabalar amaliyoti bo‘limi boshlig‘i S.Karimov, Registrator ofisi menejeri M.Norqulova hamda Milliy bank xodimi S.Sirojiddinov ishtirok etdilar.

Tadbir davomida QXI-122 — Iqtisodiyot (qishloq xo‘jaligi iqtisodiyoti), ORI-122 — Iqtisodiyot (oziq-ovqat va resurslar iqtisodiyoti) hamda RI-122 — Raqamli iqtisodiyot (tarmoqlar va sohalar bo‘yicha) yo‘nalishlari talabalari uchun “Kelajakka qadam” dasturining mazmun-mohiyati, uning ustuvor yo‘nalishlari va amaliy ahamiyati haqida batafsil ma’lumotlar berildi.

Shuningdek, bugungi kunda talabalar va bitiruvchilar uchun ajratilayotgan imtiyozli kreditlar, ularning foiz stavkalari, muddatlari, qaytarish shartlari hamda kredit olish tartibi yuzasidan atroflicha tushuntirish berildi. Mutaxassislar tomonidan kredit mablag‘laridan samarali foydalanish, tadbirkorlik faoliyatini yo‘lga qo‘yish hamda startap loyihalarni moliyalashtirish imkoniyatlari haqida ham tavsiyalar berildi.

Uchrashuv yakunida talabalar o‘zlarini qiziqtirgan savollar bilan murojaat qilib, batafsil javob oldilar. Mazkur ochiq muloqot yoshlarning tashabbuskorligini qo‘llab-quvvatlash va ularni mustaqil iqtisodiy faoliyatga rag‘batlantirishda muhim ahamiyat kasb etdi.