2025-yil 10-aprel kuni soat 9:30 da TDIU Samarqand filiali tomonidan iqtisod fanlari doktori, professor, “O‘zbekistonda xizmat ko‘rsatgan iqtisodchi” Murtazaqul Xusanovich Xusanovning 95 yillik yubileyiga bag‘ishlangan Respublika ilmiy-amaliy konferensiyaning ochilish marosimi bo‘lib o‘tdi. Ushbu sessiyani iqtisodiy fanlar doktori Ibragim G‘aniyev boshqardi.

Konferensiyani ochib bergan TDIU Samarqand filiali direktori Olim Murtazaev o‘z nutqida ustoz Xusanovning ilmiy maktabi va iqtisodiy nazariyalarni amaliyotga tadbiq etishdagi xizmatlarini alohida ta’kidladi. U, shuningdek, ustozining o‘ziga xos pedagogik yondashuvi orqali bugungi kunda yetuk iqtisodchi kadrlar yetishib chiqqanini eslab o‘tdi.

SamISI professori M.Q. Pardayev o‘z nutqida Murtazaqul Xusanovichning ilmiy merosi, xususan, mehnat va unga haq to‘lash borasidagi qarashlarini so’zlab berdi.

Qozog‘istondagi Esil universiteti professori Dametken Medikhanovna Turakulova TDIU Samarqand filiali va Esil universiteti o‘rtasidagi hamkorlik haqida va kelgusida bu hamkorlikni yangi darajaga ko‘tarish bo’yicha o’z takliflarini aytib o‘tdi.

SamDVMCH BU dotsenti I.S. Salomov esa Murtazaqul Xusanovich bilan ilk bor talaba bo‘lgan yillarini eslab, uning qat’iy intizomi, talabchanligi va ayni paytda insonparvarligi haqida so‘zlab berdi.

T.H. Xayitov ustoz M. Xusanovning Samarqand iqtisodiy maktabini shakllantirishdagi hissasini alohida e’tirof etdi. U o‘z nutqida ustoz bilan 90-yillarda birgalikda amalga oshirilgan iqtisodiy tahlillar asosidagi loyihalarni esga oldi.

TDIU Samarqand filiali "Yashil iqtisodiyot va barqaror biznes" kafedrasi dotsenti Ibragim G‘aniyev ustozning tarjimai holi bilan tanishtirar ekan, uning ilmiy faoliyatidagi asosiy bosqichlarni sanab o‘tdi. “Ustoz Xusanov oddiy o‘qituvchilikdan respublika darajasidagi iqtisodiy siyosatga ta’sir ko‘rsatadigan yetuk mutaxassisgacha bo‘lgan yo‘lni bosib o‘tgan edi”, deb ta'kidladilar.

Ustozning qizi Nodira Xusanova otasining insoniy fazilatlari va oilaviy mehribonligi haqida so‘z yuritdi. “Har bir yutuqni, avvalo, xalq uchun deb qabul qilardilar. Uyimizda ham har doim ilm va fidoyilik ustuvor bo‘lgan” deb yotga olindi.

SamDVMCH BU o‘quv ishlari bo‘yicha prorektori A.A. Elmuradov ustozning xalq xo‘jaligi tarmoqlaridagi ilmiy tahlillari asosida yaratilgan tavsiyalarini eslab o‘tdi va bugungi kun talablariga hamon mos kelishini ta’kidladi.

Qarshi davlat universiteti professori G. Erkayevа ustoz bilan bo‘lgan ilk ilmiy maqola yozish jarayonini eslab, o‘sha paytdagi mehribon va yo‘lboshchi ustoz sifatidagi obrazni gavdalantirdi.

SamISI professori Q.J. Mirzayev o‘z nutqida nafaqat ustoz Xusanovning iqtisodiy fikrlashdagi chuqur nazariy yondashuvlarini, balki u kishi bilan bevosita ishlagan davrdagi shaxsiy xotiralarini ham katta ehtirom bilan esga oldi. U aspirantura bosqichini tugatib, assistent sifatida Samarqand qishloq xo‘jaligi institutida faoliyat boshlagan ilk kunlarini yodga oldi va ustoz Murtazaqul Xusanovichning bergan maslahatlari hayotida qanday muhim burilish yasaganini alohida ta’kidladi

Oxirgi so‘z Z.D. Niyazov tomonidan yakunlandi. U Murtazaqul Xusanovich Xusanovning ilmiy maktabi va uning bugungi davomchilari haqida to‘xtalib o‘tdi.

Prenar sessiyani TDIU Samarqand filiali o‘quv ishlari bo‘yicha direktor o‘rinbosari Farxod Axrorov ochib berdi. U o‘z nutqida zamonaviy iqtisodiy muammolardan biri sifatida qishloq xo‘jaligi sektorida tabiiy resurslardan oqilona va samarali foydalanish masalasiga e’tibor qaratdi. Ayniqsa, u resurslarni baholashda klassik yondashuvlardan farqli ravishda kompleks, ko‘p indikatorli tahlil usullariga ehtiyoj borligini ta’kidladi.

Farxod Axrorov o‘z chiqishida quyidagi fikrlarni ilgari surdi:

“Qishloq xo‘jaligida yer, suv, havo va biologik resurslar nafaqat ishlab chiqarish vositasi, balki barqaror yashash va oziq-ovqat xavfsizligining asosi hisoblanadi. Ularni baholashda faqat iqtisodiy daromad yoki hosildorlikka asoslanish yetarli emas. Biz ekologik, ijtimoiy va uzoq muddatli iqtisodiy ko‘rsatkichlarni birlashtirgan ko‘p mezonli baholash tizimiga o‘tishimiz zarur.”

Ushbu yondashuv doirasida Axrorov, masalan, sug‘oriladigan yerlarning iqtisodiy qiymatini baholashda faqat yer maydoni va hosildorlik emas, balki suv resurslarining mavjudligi, iqlim o‘zgarishiga chidamlilik va atrof-muhitga ta’sir ko‘rsatkichlarini ham hisobga olish lozimligini alohida takidlab o’tdi.

Shundan so'ng konferensiya ishtirokchilari o'z maqolalari orqali tayyorlagan prezentatsiyalarini birin-ketin himoya qildilar. Konferensiyalar so'ngida ishtirokchilar sertifikat va tashakkurnomalar bilan taqdirlanishdi. Konferensiya yuqori saviyada bo'lib o'tdi.