Toshkent davlat iqtisodiyot universiteti Samarqand filialida Buxgalteriya va moliya fakulteti tashabbusi bilan buyuk alloma Ibn Xaldunning “Muqaddima” asariga bag‘ishlangan ilmiy-muhokama tadbiri yuqori saviyada tashkil etildi. Mazkur tadbir nafaqat tarixiy-nazariy g‘oyalarni o‘rganish, balki talabalarning ilmiy tafakkuri, tahliliy yondashuvi va mustaqil fikrlash madaniyatini rivojlantirishga xizmat qildi.

Tadbir davomida talabalarga “Muqaddima”ning eng asosiy falsafiy qarashlari, davlat boshqaruvi, jamiyat rivoji, iqtisodiy jarayonlar va insoniyat taraqqiyotiga oid ilg‘or g‘oyalari haqida batafsil ma’lumot berildi. Ishtirokchilar asarning dolzarbligi, hozirgi zamon iqtisodiy jarayonlariga mos jihatlari va ilmiy meros sifatidagi ahamiyatini bahs-munozaralar orqali chuqur tahlil qildilar.

Muhokama jarayoni jonli savol-javoblar, fikr almashuv, guruhlar kesimida tahlil qilish va taqqoslashlar bilan boyidi. Tadbir yoshlar uchun haqiqiy intellektual makon, ilmiy izlanuvchanlikni kuchaytiruvchi manbaga aylandi.

Tadbir yakunida eng faol qatnashgan talabalar esdalik sovg‘alari bilan taqdirlandi. Bu esa nafaqat rag‘bat, balki ilmiy izlanishga bo‘lgan ishtiyoqni yanada kuchaytiruvchi motivatsion omil bo‘ldi.