Toshkent davlat iqtisodiyot universiteti Samarqand filiali Yoshlar ittifoqi boshlang‘ich tashkiloti tashabbusi bilan “Ochiq eshiklar kuni” doirasida Oʻzbekiston Respublikasi Milliy gvardiyasi Samarqand viloyati bo‘yicha boshqarmasiga talabalar tashrifi tashkil etildi.

Tashrif davomida talabalar Milliy gvardiya faoliyati, uning asosiy vazifalari hamda zamonaviy harbiy tuzilma haqida batafsil ma’lumot oldilar. Ular qurol-aslaha va maxsus texnikalar bilan yaqindan tanishib, ularning qo‘llanilish jarayonlari haqida mutaxassislar tomonidan berilgan tushuntirishlarni tingladilar. Amaliy mashg‘ulot sifatida kamondan o‘q uzish jarayonida ishtirok etish imkoniyati yaratildi.

Shuningdek, harbiy xizmatchilar tomonidan jangovar va saf tayyorgarligi bo‘yicha ko‘rgazmali chiqishlar namoyish etildi. Ushbu chiqishlar talabalarda katta taassurot qoldirdi.

Tadbir doirasida “Rahbar va yoshlar uchrashuvi” tashkil etilib, ochiq muloqot o‘tkazildi. Unda yoshlar o‘zlarini qiziqtirgan savollarga javob oldilar. Mazkur tadbir yoshlarning harbiy sohaga qiziqishini oshirib, ularda vatanparvarlik, fidoyilik va mas’uliyat tuyg‘ularini yanada mustahkamladi.