O‘zbekiston va Latviya oliy ta’lim muassasalari hamkorligi yangi bosqichda

 O‘zbekiston oliy ta’limi xalqaro miqyosda hamkorlikni kengaytirishda izchil qadam tashlamoqda. Shu maqsadda, Riga shahrida o‘tkazilgan I-Xalqaro Forum doirasida O‘zbekiston va Latviya oliy ta’lim muassasalari rahbarlari o‘zaro tajriba almashdilar.

🇱🇻 Delegatsiya Riga markazida joylashgan, dunyoning eng nufuzli TOP-1000 talik oliy ta’lim muassasalari ro‘yxatiga kiruvchi Latviya Universiteti faoliyati bilan yaqindan tanishdi. Universitetning ilmiy ishlar bo‘yicha prorektori, professor Guntars Kitenbergs O‘zbekiston Respublikasi Oliy ta’lim, fan va innovatsiyalar vaziri Qong‘ratbay Sharipov boshchiligidagi rektorlar va oliy ta’lim muassasalari rahbarlariga:
• zamonaviy kampuslar,
• ilg‘or laboratoriyalar,
• xalqaro ta’lim dasturlari va mutaxassislik yo‘nalishlari haqida batafsil ma’lumot berdi.

 Uchrashuv yakunida Latviya Universiteti hamda O‘zbekistondagi bir qator universitetlar o‘rtasida ilmiy-tadqiqot faoliyati, professor-o‘qituvchilar va talabalar almashinuv dasturlarini rivojlantirish, qo‘shma loyihalar tashkil etish yuzasidan kelishuvlarga erishildi.

 Shuningdek, forum ishtirokchilari Rigadagi Transport va telekommunikatsiya institutiga ham tashrif buyurishdi. Institut rektori, professor Jirus Kanels mehmonlarni kutib olib, transport tizimi, raqamli telekommunikatsiya va muhandislik yo‘nalishlarida yaratilgan imkoniyatlar, xalqaro talabalik muhiti bilan tanishtirdi.

 Mazkur nufuzli tadbirda Toshkent davlat iqtisodiyot universiteti Samarqand filiali nomidan o‘quv ishlari bo‘yicha direktor o‘rinbosari F. Ahrorov hamda Qo‘shma ta’lim dasturlari koordinatori Sh. Yuldashev faol ishtirok etib, Latviya hamkasblari bilan qo‘shma loyihalar yuzasidan muhokamalar olib bordilar.

 Ushbu forum O‘zbekiston oliy ta’lim tizimini xalqaro maydonga yanada faol integratsiya qilish, xorijiy tajribalarni mamlakatimiz ta’lim muhitiga tatbiq etish va talabalar uchun keng imkoniyatlar yaratishda muhim qadamlardan biri bo‘ldi.