TDIU Samarqand filiali direktori, professor Olim Murtazayevning Mustaqilligimizning 34 yilligi munosabati bilan tabrigi

Aziz hamkasblar, qadrli talabalar va hurmatli hamyurtlar!

Sizlarni mamlakatimizning eng ulug‘ va eng aziz ayyomi — O‘zbekiston Respublikasi Mustaqilligining 34 yilligi bayrami bilan chin qalbimdan samimiy muborakbod etaman.

O‘tgan yil hammamiz uchun sinovli, murakkab davr bo‘ldi. Shunday bo‘lsa-da, biz birgalikda barcha qiyinchiliklarni yengib, o‘zaro qo‘llab-quvvatlab, filialimizning rivojlanishida yangi marralarni zabt eta oldik. Bugun faxr bilan aytishim mumkinki, bu yutuqlarimizning barchasi siz — fidoyi professor-o‘qituvchilarimizning mehnati, talabalarimizning intilishi, xodimlarimizning mas’uliyati va butun jamoamizning birdamligi samarasidir.

Bizning filialimiz yosh bo‘lishiga qaramay, qisqa vaqt ichida salmoqli yutuqlarga erishdi. Bu esa, avvalo, jamoamizdagi mehr-oqibat, bir-biriga suyanish, hamjihatlik va fidoyilikning yorqin isbotidir.

Aziz talabalar! Siz — bizning kelajagimiz, orzu va ishonchimizsiz. Yangi o‘quv yilini yangicha kuch-g‘ayrat, katta maqsad va orzular bilan boshlashingizni tilayman. Sizning ilmga chanqoqligingiz va izlanishingiz filialimizning eng katta boyligidir.

Hurmatli ustozlar va hamkasblar! Sizlarning fidokorona mehnatingiz tufayli filialimizning nufuzi tobora yuksalib bormoqda. Sizlarga mustahkam sog‘liq, oila baxti va kasbiy faoliyatingizda ulkan muvaffaqiyatlar tilayman.

Yangi o‘quv yili bizga yangidan-yangi imkoniyatlar ochsin. Bir-birimizni qo‘llab, yelkama-yelka berib, mustaqil O‘zbekistonimiz ravnaqi uchun, filialimiz taraqqiyoti uchun fidokorona mehnat qilaylik. Ishonchim komilki, bizning jamoamiz bundan ham ko‘proq yutuqlarga erishadi.

Yurtimiz tinch, istiqlolimiz boqiy bo‘lsin!
Bayramingiz muborak, aziz do‘stlar!

Hurmat bilan,
Professor Olim Murtazayev
TDIU Samarqand filiali direktori