Samarqand shahrida oliy ta’lim muassasalari bitiruvchilarining bandligiga ko‘maklashish, ularni munosib ish o‘rinlari bilan ta’minlash va yoshlarni tadbirkorlik faoliyatiga jalb etish maqsadida “TalabaExpo – 2025” kasb ko‘rgazmasi o‘z faoliyatini boshladi.

Tantanali ochilish marosimida Samarqand viloyati hokimi o‘rinbosari Husan To‘xtayev, Oliy ta’lim, fan va innovatsiyalar vazirligi departamenti boshlig‘i Abduvali Xoliqov, “Kelajakka qadam” markazi direktori Elmurod Hoshimov, hamda Samarqand davlat universiteti rektori Rustam Xolmurodovlar kirish so‘zi bilan ishtirok etdilar.

Ko‘rgazma doirasida turli tashkilotlar, tijorat banklari, xususiy korxonalar va ta’lim muassasalari o‘z stendlari bilan qatnashib, talabalar va bitiruvchilarga mavjud bo‘sh ish o‘rinlari, amaliyot dasturlari, startap loyihalar va grant imkoniyatlari haqida batafsil ma’lumotlar taqdim etishdi.

Tadbir davomida ishtirokchilarga “Kelajakka qadam” markazi tashabbusi bilan yoshlar bandligini ta’minlash, ularni zamonaviy kasblarga yo‘naltirish va o‘z biznes g‘oyalarini ro‘yobga chiqarish borasidagi dasturlar haqida ham tanishtiruvlar o‘tkazildi.

Bu ko‘rgazma yoshlar uchun nafaqat ish topish maydoni, balki o‘zini rivojlantirish va professional tarmoq yaratish imkoniyatini ham taqdim etmoqda.