2025-yil 15–16 may kunlari Buyuk Britaniyaning London shahrida bo‘lib o‘tgan O‘zbekiston–Buyuk Britaniya Ta’lim Forumi doirasida Toshkent davlat iqtisodiyot universiteti Samarqand filiali direktor o‘rinbosari, iqtisod fanlari doktori, professor Farhod Ahrorov O‘zbekiston oliy ta’lim sohasi vakillaridan iborat rasmiy delegatsiya tarkibida ishtirok etdi.

Forum O‘zbekiston Respublikasi Oliy ta’lim, fan va innovatsiyalar vazirligi, British Council, O‘zbekistonning Londondagi elchixonasi, London Janubiy Bank universiteti (LSBU), Vestminster universiteti, Toshkentdagi Vestminster xalqaro universiteti va TEAM universiteti hamkorligida tashkil etildi.
Mazkur Forum “Barqaror hamkorliklarni rivojlantirish: inklyuziv universitetlar va sanoat bilan integratsiya” mavzusiga bag‘ishlanib, oliy ta’lim tizimidagi islohotlar, universitet-avtonomiyasi, sifatni ta’minlash tizimlari, sanoat bilan hamkorlik, duallik, tadbirkorlikni qo‘llab-quvvatlash, inklyuziv ta’lim hamda xalqaro qo‘shma dasturlarni kengaytirish kabi ustuvor yo‘nalishlarga e’tibor qaratdi.

Farhod Ahrorov Vestminster universitetida bo‘lib o‘tgan “Oliy ta’limda boshqaruv va sifatni ta’minlash: tajriba va istiqbollar” mavzusidagi sessiyada ma’ruza bilan qatnashib, TDIU Samarqand filialida amalga oshirilayotgan boshqaruv islohotlari, sifat kafolati tizimi va xalqaro hamkorlik tajribasini taqdim etdi. U, shuningdek, universitetlarda uzluksiz takomillashtirish madaniyatini shakllantirishda professionallik, fikr almashinuvi va tashqi baholash tizimlarining ahamiyati yuzasidan o‘z mulohazalarini bildirdi.
​
Forum doirasida, shuningdek, bir qator yetakchi oliy ta’lim muassasalari bilan qo‘shma ta’lim dasturlarini ishlab chiqish, xalqaro talabalarni jalb etish, o‘qituvchilar almashinuvini yo‘lga qo‘yish va yozgi maktablar tashkil etish kabi masalalarda amaliy muzokaralar olib borildi.
TDIU Samarqand filiali ushbu Forumda ishtirok etgan holda, oliy ta’lim tizimida xalqaro standartlar asosidagi hamkorlikni mustahkamlash, ta’lim sifatini oshirish va barqaror rivojlanishni ta’minlash yo‘lidagi faoliyatini yanada kengaytirmoqda.