2025-yil 18-oktabr kuni TDIU Samarqand filiali “Iqtisodiyot” fakulteti tarkibidagi “Raqamli iqtisodiyot va axborot texnologiyalari” kafedrasi professor-o‘qituvchilari Qo‘shrabot tumanidagi 1- va 2-son ixtisoslashtirilgan maktab-internatlariga tashrif buyurib, o‘quv muassasalari bilan hamkorlikni yanada kuchaytirish maqsadida qator uchrashuv va seminarlarni o‘tkazdilar.

Tashrif davomida kafedra dotsentlari U. Ubaydulayev va X. Xudoyberdiyevlar o‘quvchilar uchun “Matematikaning inson hayotidagi o‘rni” mavzusida ma’rifiy seminar-trening tashkil etishdi. Ushbu mashg‘ulotda matematikaning nafaqat an’anaviy fan sifatida, balki zamonaviy texnologiyalar, iqtisodiy jarayonlar va hayotiy qarorlar qabul qilishdagi ahamiyati keng yoritildi.

Seminar davomida o‘quvchilar bilan ochiq va samimiy muloqot o‘tkazilib, ularni qiziqtirgan masalalar yuzasidan batafsil tushuntirishlar berildi. O‘quvchilar zamonaviy kasblar, raqamli iqtisodiyotning kelajagi, sun’iy intellekt va ma’lumotlar tahlili sohalarining istiqbollari haqida ham qo‘shimcha ma’lumotlar olishdi.

Uchrashuv yakunida maktab-internatlar rahbariyati bilan ham kelgusida hamkorlik yo‘nalishlari — qo‘shimcha o‘quv mashg‘ulotlari, mahorat darslari, fan olimpiadalariga tayyorlov, ilm-fan yo‘nalishidagi loyihalar bo‘yicha o‘zaro rejalashtirish ishlari amalga oshirildi. Tadbir mazmunan serqirra, ilmiy jihatdan samarali va o‘quvchilar uchun yuqori motivatsiya baxsh etuvchi ruhda o‘tdi.