2025-yil 20-noyabr kuni Toshkent davlat iqtisodiyot universiteti Samarqand filiali dotsenti Bobur Sobirov AQShning Virjiniya shtatida joylashgan Washington University of Science and Technology (WUST) universitetiga rasmiy tashrif bilan bordi. Mazkur tashrif ikki ta’lim muassasasi o‘rtasida uzoq muddatli hamkorlikni kengaytirish, yangi akademik loyihalarni yo‘lga qo‘yish hamda xalqaro tajriba almashinuvini kuchaytirish yo‘lida muhim qadam bo‘ldi.

Tashrif davomida mehmonlarga WUSTning zamonaviy infratuzilmasi, jumladan, o‘quv jarayonlari tashkil etilgan auditoriyalar, ilg‘or texnologiyalar bilan jihozlangan laboratoriyalar, kompyuter markazlari, onlayn ta’lim tizimlari hamda talabalarga yaratilgan qulay ovqatlanish va dam olish maskanlari batafsil tanishtirildi. Shuningdek, bitiruvchilarning bandligini qo‘llab-quvvatlovchi raqamli platformalar bilan ham tanishildi.

WUST tomonidan joriy etilgan Triple Mission (Diplom – Ko‘nikmalar – Ish bilan ta’minlash) va Triple A (Akkreditatsiyalangan – Arzon – Oson kirish mumkin) tamoyillari universitetning ta’lim ekotizimini yuqori sifat, amaliy ko‘nikmalar va global mehnat bozoriga chiqish imkoniyati bilan uyg‘unlashtiradi. Ayniqsa, universitetning xalqaro standartlarga mos onlayn MBA dasturi zamonaviy menejment bo‘yicha chuqur bilim olish uchun keng imkoniyat yaratadi.

Tashrif yakunida ikki tomon o‘rtasida Memorandum of Understanding (MoU) imzolashga kelishib olindi. Memorandum quyidagi yo‘nalishlarni qamrab oladi:

• qo‘shma ilmiy-tadqiqot faoliyatini rivojlantirish;

• professor-o‘qituvchilar va talabalar almashinuvi dasturlarini yo‘lga qo‘yish;

• magistratura va PhD tadqiqotlarida qo‘shma ilmiy rahbarlikni tashkil etish;

• Double Degree qo‘shma diplom dasturlarini ishga tushirish;

• seminarlar, treninglar, yozgi va qishki maktablarni birgalikda o‘tkazish.

Mazkur hamkorlik TDIU Samarqand filiali va WUST o‘rtasida ilmiy salohiyatni oshirish, ta’lim sifatini xalqaro mezonlar asosida mustahkamlash va talabalarga kengroq akademik imkoniyatlar yaratishda muhim o‘rin tutadi. Yashil iqtisodiyot va barqaror biznes yo‘nalishlari bo‘yicha olib borilgan suhbatlar esa O‘zbekiston–AQSh o‘rtasidagi ta’lim aloqalarini yanada mustahkamlashga xizmat qiladi.