2025-yil 20-noyabr kuni Toshkent Davlat Iqtisodiyot Universiteti Samarqand filiali dotsenti Bobur Sobirov AQShning Virjiniya shtatida joylashgan Washington University of Science and Technology (WUST)ga tashrif buyurdi. Ushbu tashrif ikki oliy ta’lim muassasasi o‘rtasida hamkorlikni mustahkamlash, akademik aloqalarni kengaytirish va yangi loyihalarni yo‘lga qo‘yish yo‘lidagi muhim bosqich bo‘ldi.

Tashrif davomida dotsent Bobur Sobirov universitetning zamonaviy infratuzilmasi, xalqaro ta’lim standartlariga mos o‘quv jarayoni va talabalar uchun yaratilgan sharoitlar bilan batafsil tanishdi. Jumladan, ilmiy-tadqiqot laboratoriyalari, kompyuter markazlari, innovatsion o‘quv auditoriyalari, onlayn ta’lim tizimlari, talabalar uchun mo‘ljallangan ovqatlanish va dam olish zonalari hamda ishga joylashishni qo‘llab-quvvatlovchi bo‘lim faoliyati o‘rganildi. Ayniqsa, mehnat bozoriga chiqish jarayonini yengillashtiruvchi zamonaviy raqamli platformalarning joriy etilgani alohida e’tirof etildi.

WUST universitetining Triple Mission (Diplom, Ko‘nikmalar, Ish bilan ta’minlash) va Triple A (Akkreditatsiyalangan, Arzon, Oson kirish mumkin) tamoyillari asosida shakllangan ekotizimi talabalar uchun sifatli ta’lim, amaliy ko‘nikmalar va keng ish imkoniyatlarini yaratishga xizmat qilmoqda. Shu bilan birga, WUSTning onlayn MBA dasturi global mehnat bozorida talab yuqori bo‘lgan zamonaviy bilimlarni egallash uchun keng imkon yaratadi.

Tashrif yakunida tomonlar o‘rtasida Memorandum of Understanding (MoU) imzolandi. Mazkur memorandum doirasida qo‘shma ilmiy tadqiqotlar, professor-o‘qituvchilar va talabalar almashinuvi, magistratura va PhD dasturlarida qo‘shma ilmiy rahbarlik, Double Degree dasturlarini joriy etish bo‘yicha kelishuvga erishildi. Shuningdek, seminarlar, yozgi va qishki maktablar, qo‘shma akademik tashabbuslar va xalqaro tanlovlar tashkil etilishi rejalashtirilgan.

Ushbu hamkorlik ikki universitet o‘rtasida ilmiy salohiyatni oshirish, xalqaro ta’lim standartlarini rivojlantirish va talabalar uchun yangi imkoniyatlar yaratishda muhim ahamiyat kasb etadi. Yashil Iqtisodiyot va Barqaror Biznes kafedrasi dotsentining mazkur tashrifi O‘zbekiston va AQSh o‘rtasidagi ta’lim diplomatik aloqalarini yanada mustahkamladi.