1-oktabr – Ustoz va murabbiylar kuniga bag‘ishlangan tantanali bayram TDIU Samarqand filialida keng nishonlandi

Joriy yilning 30-sentabr kuni Toshkent davlat iqtisodiyot universiteti Samarqand filialida ustoz va murabbiylarimiz bayramiga bag‘ishlangan katta bayram tadbiri bo‘lib o‘tdi. 

 Bayramni filial direktori, professor Olim Murtazayev ochib berdi. O‘z nutqlarida fidoyi ustozlarni qutlug‘ sana bilan samimiy muborakbod etar ekan, ularning ta’lim taraqqiyotidagi o‘rni, yosh avlodni tarbiyalashdagi ulkan xizmatlari va ma’naviyatni yuksaltirishdagi hissasi haqida alohida to‘xtaldi. Direktor ustozlarni doimo bilim va ma’rifat tarqatishda, jamiyat kelajagini bunyod etishda asosiy kuch deb ta’kidladi. 

Tadbir davomida filial talabalari turli tillarda samimiy she’rlar o‘qib, ustozlariga bo‘lgan cheksiz hurmat va ehtiromlarini ifoda etdilar. Shuningdek, “Yoshlar va Ittifoqi” jamoasining raqs va kuy-qo‘shiqlari bayramga yanada ko‘rk bag‘ishladi.

Tadbirning eng hayajonli qismi yakunda bo‘ldi. Filial direktori professor Olim Murtazayev fidoyi ustozlarga faxriy yorliqlar topshirib, ularning mashaqqatli mehnatini e’tirof etdi. Kasaba uyushmasi tomonidan ham ustozlarga esdalik sovg‘alari taqdim etildi.

 Bayram samimiy tilaklar, ezgu so‘zlar va mehrga to‘la tabassumlar ila yakunlandi. Tadbir ishtirokchilari qalbida unutilmas taassurot qoldirdi.