Assalomu alaykum, Toshkent davlat iqtisodiyot universiteti Samarqand filialining hurmatli jamoa va aziz talabalar! Sizlarni kirib kelayotgan 2025-yil bilan chin dildan tabriklayman! Yangi yil oilalaringizga farovonlik, xonadonlaringizga qut-baraka, qalbingizga xotirjamlik va baxt olib kelsin. 2024-yil universitetimiz hayotida katta yutuqlar va muhim voqealar yili bo‘ldi, deb bemalol ayta olamiz. Bu davrda nafaqat respublika, balki xalqaro miqyosda ham universitetimizning obro‘-e’tibori yanada oshdi. Ilmiy izlanishlar soni va sifati sezilarli darajada ortdi, professor-o‘qituvchilar xorijiy davlatlarda tajriba orttirib qaytishdi. Talabalarimiz esa xalqaro konferensiyalar va nufuzli tanlovlarda yuksak natijalarga erishdilar. Shu bilan birga, yil davomida yangi ilmiy loyihalar amalga oshirildi, o‘quv dasturlari zamonaviy talablar asosida yangilandi va talabalarimiz uchun keng imkoniyatlar yaratildi. Madaniy va sport tadbirlari, ijodiy loyihalar, “Besh tashabbus” olimpiadalari, sport musobaqalari muvaffaqiyatli tashkil etildi. Bizning talabalarimiz xalqaro sport musobaqalari, "Zakovat" intellektual turnirlari va fan olimpiadalarida yuqori natijalarni qo‘lga kiritib, Vatanimiz bayrog‘ini faxr bilan baland ko‘tarishdi. Ishonchim komilki, barchamiz birgalikda 2025-yilda ham universitetimizning nufuzini yanada oshirish, yurtimiz rivojiga munosib hissa qo‘shish uchun astoydil mehnat qilamiz. Yana bir bor barchangizni Yangi yil bilan tabriklayman! Yangi marralar, yutuqlar va bilimlar barchamizga hamroh bo‘lsin!