O‘zbek ayollarining milliy liboslari — o‘zbek xalqining tarixdagi kiyim-kechaklari bilan bog‘liq ma’lumotlarni arxeologik qazilmalar jarayonida topilgan qadimiy katta devoriy suratlar, turli buyumlarga tushirilgan tasvirlar, o‘rta asrlardagi kitob miniatyuralari beradi. O‘rta asrlarga oid miniatyuralar o‘zbek kiyimlarining o‘ziga xos uslubi, ya’ni tipi shakllanganligi va ular keyingi davrgacha saqlanganligini ko‘rsatuvchi noyob namunalardir. Xalqning kiyim-kechaklaridagi o‘zgarishlar, asosan, XX asr boshlarida sezilarli ravishda namoyon bo‘ladi va undagi transformatsiya, asosan, shaharlarda ochiq ko‘zga tashlanadi.XIX asrning birinchi yarmida O‘rta Osiyoga Rossiyadan ip gazlama va boshqa matolarning keltirilishi sababli XIX asr oxiri va XX asr boshida mahalliy aholi orasida asosan fabrikada tayyorlangan ip gazlamalar: chit, bo‘z, xom surpdan tikilgan kiyim-kechaklarni kiyish urf bo‘lgan. Boy-badavlat kishilar esa kimxob, ipak, atlas, duxoba, rang-barang movutlarni sotib ola boshlaganlar. Shunga qaramay, kosiblar dastgohidan chiqqan mahalliy gazlama: mato, bo‘z, nimshoyi kabi gazmollar (adras, beqasam, podshoi, kimxob, xonatlas, katakshoyi kabilar)ning turli xillariga ehtiyoj katta bo‘lgan.