2024-yil 28-noyabr kuni Toshkent davlat iqtisodiyot universiteti Samarqand filialida uglerod bozori mavzusida ochiq amaliy dars tashkil etildi. Darsni "Yashil iqtisodiyot va barqaror biznes" kafedrasi assistenti Saydullayev A. olib bordi. Ushbu darsda uglerod bozorining iqtisodiy, ekologik va ijtimoiy ta’sirlari, korxonalarning foydasini maksimallashtirish jarayonida duch keladigan imkoniyat va cheklovlar chuqur tahlil qilindi.

Uglerod bozori hozirgi davrda global muammolardan biri bo‘lgan iqlim o‘zgarishiga qarshi kurashda muhim rol o‘ynaydi. Ushbu dars davomida talabalar ushbu bozor mexanizmlarini tushunib, uglerod chiqindilarini kamaytirish bo‘yicha korxonalarning qabul qiladigan strategik qarorlarini qanday amalga oshirish kerakligi borasida kengroq tasavvurga ega bo‘lishdi. Saydullayev A. uglerod bozori orqali chiqindilar hajmini boshqarish va iqtisodiy samaradorlikni oshirishning dolzarb jihatlarini amaliy misollar orqali tushuntirib berdi. Darsning asosiy qismlaridan biri sifatida talabalar uglerod savdosi tizimi asosida o‘tkazilgan simulyatsion o‘yinda faol ishtirok etdilar. Ushbu o‘yin orqali talabalar korxonalarning uglerod kvotalarini boshqarish, savdolashuv jarayonlarini amalga oshirish va qarorlar qabul qilish bo‘yicha amaliy mashqlar bajardilar. Talabalar simulyatsion o‘yinda kvotalarni optimal boshqarish orqali chiqindilarni kamaytirish va foydani oshirish usullarini tahlil qilishdi. Bu jarayon ularga nazariy bilimlarini amaliyotda sinab ko‘rish imkonini berdi.

Dars davomida uglerod bozorining nafaqat iqtisodiy, balki ijtimoiy va ekologik jihatlari ham tahlil qilindi. Uglerod savdosi tizimi orqali korxonalar nafaqat o‘z iqtisodiy foydasini oshirishi, balki atrof-muhitni muhofaza qilishga ham hissa qo‘shishi mumkinligi haqida fikrlar bildirildi. Talabalar o‘z mustaqil tahlillari orqali kelajakda uglerod bozori jarayonlarini boshqarish va ulardan unumli foydalanish borasida yangi g‘oyalarni shakllantirishdi.

Mazkur ochiq amaliy dars talabalar uchun nafaqat nazariy, balki amaliy bilim va ko‘nikmalarni egallashda katta ahamiyat kasb etdi. Ushbu dars orqali ular yashil iqtisodiyotning korxonalar faoliyatidagi o‘rni va ahamiyatini chuqurroq tushunib, uglerod bozorida qanday qarorlar qabul qilish kerakligi haqida amaliy bilimga ega bo‘lishdi.