Toshkent davlat iqtisodiyot universiteti Samarqand filialida 2025-yil 26-noyabr kuni Yoshlar ittifoqi boshlang‘ich tashkiloti va “Ekofaol talabalar” bo‘limi tashabbusi bilan “Ekovolontyor talabalar harakati” tomonidan navbatdagi ekologik tashabbus — plogging aksiyasi tashkil etildi. Tadbir “Mahalliy chiqindilar muammosi va ekotashabbuslar” mavzusi doirasida o‘tkazilib, uning asosiy maqsadi atrof-muhitni tozalash, chiqindi madaniyatini shakllantirish hamda yoshlar o‘rtasida ekologik mas’uliyatni oshirishga qaratildi.

Aksiya davomida volontyor talabalar filial hududi va unga tutash maydonlarda plastik, qog‘oz, maishiy chiqindilarni yig‘ib, ularni saralash bo‘yicha amaliy mashg‘ulotlar ham o‘tkazdilar. Plogging jarayoni nafaqat hududni tozalash, balki sog‘lom turmush tarzini targ‘ib qilish va ekologik muammolarga jamoatchilik e’tiborini qaratish uchun samarali vosita bo‘ldi.

“Ekovolontyor talabalar harakati” a’zolari ekologik madaniyatni rivojlantirish, chiqindilarni kamaytirish va tabiatni asrash bo‘yicha targ‘ibot ishlarini olib borib, ishtirokchilarga ekotashabbuslarning ahamiyati yuzasidan tushuntirishlar berdi. Tadbir yakunida aksiyada faol ishtirok etgan talabalar rag‘batlantirildi.