Toshkent davlat iqtisodiyot universiteti Samarqand filiali “Yashil iqtisodiyot va barqaror biznes” kafedrasi dotsenti, PhD Sobirov Bobur Baxtishodovich AQShning nufuzli University of Wyoming universitetida amalga oshirilgan Faculty Enrichment Program (FEP) xalqaro akademik dasturida muvaffaqiyatli ishtirok etdi.

Mazkur dastur doirasida dotsent B. Sobirov University of Wyoming’ning College of Business hamda Haub School of Environment and Natural Resources fakultetlarida ilmiy va pedagogik faoliyat olib bordi. U turizm, barqaror rivojlanish, iqtisodiyot va boshqaruv yo‘nalishlaridagi darslarni kuzatdi, mehmon ma’ruzalar o‘qidi, shuningdek, ilmiy-tadqiqot ishlari bilan faol shug‘ullandi.

Dastur davomida dotsent B. Sobirov universitet professorlari Sara Ghezzi va Alexandre Skiba bilan hamkorlikda turizm nazariyasi va amaliyoti, iqtisodiy modellashtirish, turizmning raqobatbardoshligi hamda zamonaviy ta’lim metodikasi yo‘nalishlarida ilmiy muloqotlar olib bordi. Shuningdek, Neltje Centerda tashkil etilgan xalqaro Academic Writing Retreat seminarida Misr, Braziliya va AQShdan kelgan 11 nafar professor bilan birgalikda ishtirok etdi.

Ilmiy faoliyat bilan bir qatorda dotsent B. Sobirov AQSh va O‘zbekiston turizmini solishtirma tahlil qilish, raqamli transformatsiya, kreativ industriyalar hamda turizm siyosati mavzularida qator ma’ruzalar bilan chiqish qildi. U Las-Vegas shahrida bo‘lib o‘tgan Global Tech Innovation Conference (GloTech) konferensiyasida asosiy ma’ruzachi (keynote speaker) sifatida qatnashdi. Shuningdek, Colorado shtati, Denver shahrida o‘tkazilgan North American Regional Science Council (NARSC) konferensiyasi hamda George Washington Universityda bo‘lib o‘tgan xalqaro anjumanlarda mentor va ekspert sifatida ishtirok etdi.

Dastur doirasida dotsent B. Sobirov AQShning 10 dan ortiq shtatlaridagi yetakchi oliy ta’lim muassasalariga tashrif buyurdi. Bundan tashqari, Yellowstone milliy bog‘i, Jackson Hole, Casper, Douglas va Cheyenne shaharlarida o‘tkazilgan o‘quv-amaliy safarlarda qatnashdi. Shuningdek, Washington University of Science and Technology bilan hamkorlik aloqalari yo‘lga qo‘yilib, TDIU Samarqand filiali bilan o‘zaro anglashuv memorandumi (MOU) imzolandi.

Mazkur xalqaro dastur dotsent B. Sobirovning ilmiy va pedagogik salohiyatini yanada oshirish, ta’lim jarayoniga ilg‘or xorijiy tajribalarni joriy etish hamda AQSh–O‘zbekiston oliy ta’lim muassasalari o‘rtasidagi akademik hamkorlikni mustahkamlashda muhim ahamiyat kasb etdi.