Toshkent davlat iqtisodiyot universiteti Samarqand filialida an’anaviy tarzda o‘tkazib kelinayotgan “Yilning eng faol talabasi” tanlovi yakuniga yetdi. Mazkur tanlov filial hayotida muhim o‘rin tutib, talabalarning har tomonlama faolligini qo‘llab-quvvatlash, ularning iqtidor va salohiyatini yuzaga chiqarish, shuningdek, sog‘lom raqobat muhitini shakllantirishga xizmat qilib kelmoqda.
Tanlov davomida o‘quv jarayonidagi yuqori natijalar, ilmiy-tadqiqot faoliyati, ijtimoiy tashabbuslar, jamoat ishlaridagi faollik hamda ma’naviy-ma’rifiy tadbirlardagi ishtirok mezon sifatida baholandi. Saralash jarayonida tashabbuskorligi, yetakchilik qobiliyati, mas’uliyati va intizomi bilan ajralib turgan talabalar g‘olib deb topildi.

Shuningdek, talabalarning yutuqlarida munosib hissasi bo‘lgan, ularni ilmiy izlanishlarga yo‘naltirgan, ma’naviy jihatdan qo‘llab-quvvatlab kelgan ustozlar va ilmiy rahbarlar ham alohida e’tirof etilib, taqdirlandi. Tadbir davomida ustoz-shogird an’analarining davomiyligi, ilmiy izlanishning ahamiyati hamda faol va tashabbuskor yoshlarni qo‘llab-quvvatlash ta’lim sifatini oshirishda muhim omil ekani alohida ta’kidlandi.
Mazkur tanlov talabalarning kelgusidagi yutuqlari uchun mustahkam motivatsiya bo‘lib xizmat qiladi hamda filialda faol, bilimli va yetuk kadrlarni tayyorlash yo‘lidagi ishlarning izchil davom etayotganini namoyon etadi.