2025-yil 30-aprel kuni Toshkent davlat iqtisodiyot universiteti Samarqand filialiga Ozarbayjonning Baku Biznes universitetidan xalqaro aloqalar bo‘yicha prorektor Gulshan Bayramova, ijtimoiy ishlar bo‘yicha prorektor Javidan Heydarov va iqtisodiyot fakulteti dekani Shahin Musayev tashrif buyurdi.

Tashrifdan ko‘zlangan asosiy maqsad — O‘zbekiston oliy ta’lim muassasalari, xususan, TDIU Samarqand filiali bilan ilmiy hamkorlikni yo‘lga qo‘yishdir. Uchrashuv davomida tomonlar professor-o‘qituvchilarning stajirovka va malaka oshirishi, talabalar almashinuv dasturlarini yo‘lga qo‘yish, doktorantlarga xorijiy ilmiy rahbarlar tayinlash, hamkorlikda ilmiy tadqiqotlar olib borish, xalqaro ilmiy jurnallarda maqolalar chop etish, ilmiy seminar va konferensiyalar tashkil etish, shuningdek, o‘quv materiallari almashinuvini yo‘lga qo‘yish bo‘yicha kelishuvga erishdilar.

Uchrashuv yakunida tomonlar o‘zaro hamkorlikni mustahkamlovchi memorandumni imzoladilar. Memorandumda qo‘shma ta’lim dasturlari, akademik almashinuvlar, ilmiy faoliyat va nashriyotlar, hamda boshqa ko‘plab hamkorlik yo‘nalishlari belgilab berildi.

Tashrif doirasida mehmonlarga esdalik sovg‘alari topshirildi. Shuningdek, ular filialda talabalarga yaratilgan sharoitlar — talabalar turar joyi, zamonaviy o‘quv laboratoriyalari, kompyuter xonalari va kutubxona bilan yaqindan tanishdilar.